Buona pulcella fut Eulalia:

Bel auret corps, bellezour anima.

Uoldrent la ueintre li do inimi;

Uoldrent la faire diaule seruir

Elle no'nt eskoltet les mals conselliers

Qu(elle d(e)o raneiet chi maent sus en ciel,

Ne por or ned argent ne paramenz,

Por manatce regiel ne preiement;

Niule cose non la pouret omque pleier

La polle sempre n amast lo do menestier.

Et poro fut p(re)sentede maximiien,

Chi rex eret a cels dis soure pagiens.

Illi enortet - dont lei nonque chielt -

Qued elle fuiet lo nom xr(stiien.

Ell ent adunet lo suon element:

Melz sostendreiet les empedementz

Qu'elle perdesse sa uirginitet.

Poros furet morte a grand honestet.

Enz enl fou lo getterent, com arde tost:

Elle colpes n(on) auret, por o nos coist.

Aczo nos uoldret concreidre li rex pagiens;

Ad une spede li roueret tolir lo chief.

La domnizelle celle kose n(on) contredist:

Uolt lo seule lazsier si ruouet krist.

In figure de colomb uolat a ciel.

Tuit oram que por nos degnet preier

Qued auuiset de nos xr(istu)s mercit

Post la mort & a lui nos laist uenir

Par souue clementia.